Sadıq Sadıqov: “Neftçi” super transferlər edəcək
18:00 10-03-2010
“Qurban olum Allaha, hər şey yaxşı olacaq”
“Neftçi” klubunun prezidenti Sadıq Sadıqovun apasport.az saytına müsahibəsi
- Sadıq müəllim, bu gün “Neftçi”nin daha bir məşqçisi - Şakir Qəribov istefa verib. İstefanın əsl səbəbi nədir?
- Bunun xüsusi səbəbi yoxdur. O, öz xahişi ilə istefa verib, ərizəsini yazıb, biz də bunu qəbul etmişik.
- “Neftçi” ötən həftə ölkə kubokunda öz meydanında “İnter”ə böyük hesabla məğlub oldu. Hazırda komanda üzvlərinin vəziyyəti necədir? Futbolçuların xüsusilə psixoloji durumu maraq doğurur.
- Qurban olum Allaha, hər şey yaxşı olacaq. Komanda psixoloji gərginlikdən çıxıb. Məğlubiyyəti də qəbul etmək lazımdır. “Neftçi” martın 12-də “İnter”lə Premyer Liqada da qarşılaşacaq. Yəqin ki, komandamız öz sözünü deyəcək. Hələ heç nə itirilməyib. Hər şey qabaqdadır.
- Yayda flaqmana yeni baş məşqçi gətiriləcəyi ilə bağlı açıqlamalar vermisiniz. Sizcə, Arif Əsədov indi “Neftçi”nin baş məşqçisi postunda çalışmağa layiqdirmi?
- Hazırda baş məşqçi vəzifəsində dəyişiklik etmək fikrində deyilik. “Neftçi” elə komandadır ki, onun mətbuatdan nəsə gizlətməyə haqqı yoxdur. Onsuz da komandaya baş məşqçi gələndə, bunu hamı görəcək, sizi aldatmağın nə mənası var ki? “Altılıq” oyunlarında “Neftçi” oyunlara Arif Əsədovu rəhbərliyi altında çıxacaq. Gələcəkdə baxacağıq, baş məşqçini dəyişmək fikrimiz olsa, dərhal mətbuata məlumat veriləcək.
- Yeri gəlmişkən, “altılıq” sisteminə münasibətiniz necədir? Bu məsələ AFFA tərəfindən mayda müzakirəyə çıxarılacaq. Bəs siz çempionatın hansı formatla keçirilməsini tərəfdarısınız?
- Bəzi mütəxəssislər deyirlər ki, “altılıq” sistemi özünü doğrultmur. “Neftçi” klubu olaraq, bu məsələni qarşıdakı günlərdə müzakirəyə çıxaracağıq. Bizdə də güclü mütəxəssislər var. Fikir mübadiləsi aparıb, yekun qərara gəldikdən sonra mövqeyimizi bildirəcəyik.
- Sonda azarkeşləri də çox maraqlandıran bir məqama toxunmaq istəyirəm. Çox güman ki, indidən yay üçün planlar qurursunuz. Mövsümlərarası fasilədə “Neftçi” super transfer edəcəkmi?
- Olacaq, olacaq. Mən cəmi iki ay öncə “Neftçi”nin prezidenti vəzifəsinə təyin olunmuşam. Özünüz də yaxşı bilirsiniz ki, həmin vaxt artıq klubda transfer məsələləri həll olunmuşdu, lazımi futbolçular alınmışdı. Buna görə də məqsədimiz indiki heyətlə çempionatı yüksək pillələrdə başa vurmaqdır. Bəli, fikrimiz var, “Neftçi” gələcəkdə güclü transferlər həyata keçirəcək.
bu xəbər
1453 dəfə oxunub
|
“Həmin epizodda top Rəşadın əlinə dəymişdi” 
“Fərid Quliyev heyətə düşmək üçün mübarizə aparmalıdır” MÜSAHİBƏ 
Polşada vurulan yeni rekord, yaxud “Qarabağ”ın digər klublarımızdan fərqi 
Şafer: Onlar özlərini həvəskar kimi aparırlar - MÜSAHİBƏ 
Elvin Əliyev: Bu il bizim qarşımızda dayanan komanda olmayacaq 
